Academy of Motion Picture Arts and Sciences ka zyrtarizuar datat për dy nga ceremonitë më të rëndësishme në historinë e çmimeve Oscar, përfshirë edhe edicionin jubilar të 100-vjetorit. Njoftimi ka ngjallur menjëherë interes të madh në industrinë e filmit dhe tek publiku në mbarë botën.
Sipas detajeve të publikuara, ceremonia e 99-të e Academy Awards do të mbahet më 14 mars 2027, ndërsa vetëm një vit më pas, më 5 mars 2028, do të zhvillohet edicioni i 100-të – një moment historik që pritet të shoqërohet me një spektakël të veçantë dhe elemente surprizë për të festuar një shekull kinematografie.
Të dyja eventet do të zhvillohen në Dolby Theatre në Los Angeles, vendi që prej vitit 2002 është kthyer në shtëpinë tradicionale të Oscars. Ceremonitë do të transmetohen drejtpërdrejt nga rrjeti amerikan ABC, duke arritur një audiencë globale në mbi 200 vende.
Megjithatë, ndryshime të rëndësishme priten në vitet në vijim. Këto do të jenë ndër transmetimet e fundit të Oscars në ABC, pasi në të ardhmen ceremonia pritet të zhvendoset drejt platformave digjitale, duke reflektuar transformimet e industrisë së medias.
Po ashtu, duke filluar nga edicioni i 101-të, Oscars do të zhvendosen në Peacock Theater në Los Angeles, ku parashikohet të qëndrojnë për një periudhë të gjatë në kuadër të një marrëveshjeje me kompaninë AEG.
Dolby Theatre ka qenë mikpritësi kryesor i ceremonisë për më shumë se dy dekada, me një përjashtim të vetëm në vitin 2021, kur për shkak të pandemisë ceremonia u zhvillua në Union Station.
Me afrimin e jubileut të 100-vjetorit, pritshmëritë janë më të larta se kurrë, ndërsa industria dhe fansat presin një event historik që do të nderojë trashëgiminë e kinemasë botërore.
Burimi; https://variety.com/2026/film/awards/oscars-2027-2028-dates-announced-100th-academy-awards-1235967890/
Foto; Frepik.co