BTS do të rikthehen në skenën e American Music Awards si grup i plotë, duke shënuar një nga momentet më të rëndësishme të karrierës së tyre pas një pauze të gjatë. Rikthimi i grupit korean në AMAs ka ngjallur entuziazëm të madh mes fansave në mbarë botën.
Sipas mediave të huaja, grupi është nominuar në disa kategori kryesore këtë vit, përfshirë “Artistin e Vitit”, “Artisti më i Mirë Mashkull K-Pop” dhe “Kënga e Verës”. BTS do të përballen me emra të mëdhenj të industrisë muzikore si Taylor Swift, Bruno Mars, Lady Gaga dhe Bad Bunny.
Kjo paraqitje konsiderohet historike pasi është rikthimi i parë i BTS si grup i plotë në AMAs pas rreth tre vitesh e nëntë muajsh. Fansat e grupit, të njohur si ARMY, kanë shpërthyer në reagime në rrjetet sociale, duke e cilësuar rikthimin si një nga ngjarjet më të mëdha muzikore të vitit.
BTS u rikthyen së fundmi edhe me albumin e tyre të pestë në studio, “ARIRANG”, ndërsa kënga “SWIM” arriti të sigurojë menjëherë një nominim për “Këngën e Verës”.
Grupi ka një histori të suksesshme në American Music Awards, ku deri tani kanë fituar 12 çmime. Ata hynë në histori në vitin 2021 si artistët e parë koreanë që fituan çmimin kryesor të AMA-së.
Shfaqja e këtij viti pritet të jetë edhe paraqitja e tyre e parë fizike në event pas afro pesë vitesh, duke e kthyer rikthimin e BTS në një nga momentet më të përfolura të muzikës globale.