Netflix do të publikojë më 3 qershor dokumentarin e ri me tre pjesë “Michael Jackson: Verdict”, i cili rikthen në vëmendje një nga proceset gjyqësore më të përfolura në historinë e showbiz-it, gjyqin e Michael Jackson në vitin 2005.
Seriali trajton akuzat për ngacmim seksual ndaj fëmijëve që u ngritën kundër ikonës së muzikës në vitin 2003, si dhe procesin gjyqësor që pasoi, ku artisti u shpall i pafajshëm për të gjitha akuzat.
Dokumentari sjell dëshmi dhe rrëfime nga persona që ishin pjesë direkte e çështjes, përfshirë anëtarë të jurisë, dëshmitarë, prokurorë dhe pjesëtarë të ekipit mbrojtës të Jackson.
Sipas krijuesve të projektit, dokumentari synon të ofrojë një pasqyrë më të plotë dhe më të detajuar të ngjarjeve që ndodhën në sallën e gjyqit, duke qenë se në atë kohë kamerat nuk lejoheshin gjatë procesit gjyqësor.
Regjisori Nick Green dhe producentja ekzekutive Fiona Stourton deklaruan për Tudum se pas dy dekadash ishte momenti i duhur për të rishikuar këtë çështje që vazhdon të ndajë opinionin publik edhe sot.
“Michael Jackson: Verdict” është krijuar nga David Herman dhe prodhohet nga Candle True Stories.
Dokumentari pritet të rikthejë debatet dhe diskutimet rreth figurës së Michael Jackson, duke sjellë edhe një herë në fokus një nga çështjet më kontroverse të industrisë së argëtimit.