Legjenda e muzikës Phil Collins ka dhënë shpresë për fansat e tij, duke lënë të kuptohet se nuk e ka përjashtuar mundësinë e rikthimit në muzikë, pavarësisht problemeve shëndetësore që e kanë mbajtur larg skenës vitet e fundit.
Në një nga intervistat e tij më të fundit, ish-vokalisti i grupit të famshëm Genesis zbuloi se vazhdon të mendojë për krijimin e muzikës së re dhe rikthimin në studion e tij personale.
“Vazhdoj t’i them vetes: ‘Duhet të kthehesh në studion tënde në shtëpi’. Ka gjëra mbi të cilat mund të filloj të punoj. Tani jam më i shëndetshëm sesa kam qenë për një kohë të gjatë. Do të mendoja të dilja përsëri para një publiku”, u shpreh Collins.
Megjithatë, artisti 75-vjeçar tregoi se ka zgjedhur të jetë i kujdesshëm me rikthimin e tij. Ai zbuloi se kishte refuzuar një ftesë për të performuar në ceremoninë e ardhshme të Rock & Roll Hall of Fame, e cila do të mbahet në nëntor.
“Më pyetën nëse do të performoja dhe unë thashë jo. Duhet të jesh në formën më të mirë për të bërë diçka të tillë. Nuk mund të dalësh thjesht në skenë. Duhet të ushtrohesh dhe nëse nuk këndon deri atëherë, zëri yt do të prishet dhe kjo nuk është mirë”, tha ai.
Kohët e fundit, Collins bëri një paraqitje të rrallë publike në Pallatin Buckingham, ku u shfaq në shoqërinë e ish-bashkëshortes së tij, Jill Tavelman, duke tërhequr vëmendjen e mediave dhe fansave.
Artisti kishte njoftuar tërheqjen nga aktiviteti muzikor pas turneut të fundit të Genesis në vitin 2022. Më herët këtë vit, ai foli hapur për gjendjen e tij shëndetësore, duke zbuluar se një dëmtim i shtyllës kurrizore i pësuar në vitin 2007 shkaktoi dëmtime serioze të nervave, të cilat ndikuan ndjeshëm në aftësinë e tij për të performuar.
Megjithëse rikthimi i tij në skenë mbetet ende i pasigurt, deklaratat e fundit tregojnë se Phil Collins nuk e ka humbur dëshirën për muzikën dhe mund të surprizojë fansat me projekte të reja në të ardhmen.
Burimi;https://www.instagram.com/officialphilcollins/
Foto; https://www.instagram.com/officialphilcollins/