Princi Harry dhe gjashtë paditës të tjerë mund të përballen me një faturë ligjore që arrin deri në 67 milionë dollarë, pasi humbën betejën shumëvjeçare në gjykatë kundër botuesit të tabloidit britanik Daily Mail.
Sipas avokates amerikane Nicole Brenecki, kostoja totale e çështjes mund të arrijë në rreth 50 milionë paund (67 milionë dollarë), duke përfshirë të gjithë procesin gjyqësor dhe shtatë paditësit. Megjithatë, shuma që do të paguajë secili prej tyre do të përcaktohet në një seancë të veçantë.
Ekspertja e familjes mbretërore Kinsey Schofield tha se Harry nuk pritet të paguajë të gjithë shumën, pasi një pjesë e kostove do të mbulohet nga siguracioni. Megjithatë, ajo paralajmëroi se shpenzimet kanë tejkaluar kufijtë e mbulimit të policave të sigurimit, çka do të thotë se paditësit mund të detyrohen të paguajnë një pjesë të konsiderueshme nga xhepi i tyre.
“Ky proces gjyqësor është bërë jashtëzakonisht i kushtueshëm. Edhe nëse siguracioni mbulon një pjesë të shpenzimeve, Harry mund të përballet me një faturë të rëndë financiare”, u shpreh Schofield.
Gjykata hodhi poshtë pretendimet
Një gjykatës i Gjykatës së Lartë të Britanisë vendosi kundër Princit Harry dhe paditësve të tjerë, duke argumentuar se ata nuk paraqitën prova të mjaftueshme për të vërtetuar se artikujt ishin siguruar në mënyrë të paligjshme.
Pas vendimit, Harry dhe bashkëpaditësja Baronesha Doreen Lawrence reaguan me një deklaratë të përbashkët, ku thanë se kishin shkuar në gjykatë në kërkim të drejtësisë dhe përgjegjësisë, por nuk morën asnjërën.
Ata e cilësuan vendimin si një “zbardhje të plotë” të çështjes dhe pretenduan se gjykata injoroi prova që, sipas tyre, tregonin veprimtari të paligjshme nga hetues privatë të lidhur me median.
Akuzat dhe situata financiare
Në vitin 2022, Princi Harry akuzoi Associated Newspapers se kishte siguruar informacione private përmes metodave të paligjshme, përfshirë vendosjen e pajisjeve përgjuese në makina dhe banesa. Kompania i ka mohuar vazhdimisht këto akuza.
Procesi gjyqësor zgjati 10 javë, ndërsa Harry deklaroi se ai dhe bashkëshortja e tij, Meghan Markle, kishin jetuar për vite me radhë në “mjerim absolut” për shkak të ndërhyrjeve në jetën e tyre private.
Sipas raportimeve të fundit, financat e çiftit janë vënë nën presion edhe pas përfundimit të bashkëpunimit me Netflix në muajin prill.
Harry ndodhet aktualisht në Britaninë e Madhe, ku pritet të takohet me babanë e tij, Mbretin Charles III. Megjithatë, vizita është shoqëruar me vështirësi, pasi Meghan Markle dhe dy fëmijët e tyre nuk e shoqëruan për shkak të mungesës së mbrojtjes së financuar nga shteti. Gjithashtu, sipas raportimeve, Pallati Buckingham i ka tërhequr ofertën që Harry të qëndronte në një nga rezidencat mbretërore gjatë vizitës së tij.