Emisioni i njohur amerikan “Jimmy Kimmel Live!” mund të jetë pranë fundit, sipas një raportimi të publikuar nga media amerikane Page Six. Megjithatë, televizioni ABC ka reaguar duke i cilësuar këto pretendime si të pasakta dhe spekulative.
Sipas Page Six, kontrata e Jimmy Kimmel, e cila përfundon në maj të vitit 2027, nuk pritet të rinovohet. Nëse ky informacion do të konfirmohej, sezoni i ardhshëm do të ishte i fundit për moderatorin, i cili e drejton programin që nga viti 2003.
Kimmel është një prej figurave më jetëgjata të programeve të mbrëmjes në televizionin amerikan. Ai njihet për kontratat afatshkurtra, praktikë që i ka dhënë më shumë liri për të vendosur mbi të ardhmen e tij profesionale.
Por ABC Entertainment ka hedhur poshtë lajmin për mbylljen e emisionit. Një zëdhënës i rrjetit televiziv deklaroi se informacioni është “i pasaktë” dhe se çdo raportim për të ardhmen e programit, në këtë moment, mbetet “thjesht spekulativ”.
Sipas raportimeve të mediave të huaja, kontrata aktuale e Kimmel me Disney/ABC është e vlefshme deri në maj 2027. Vetë moderatori ka folur edhe më herët për mundësinë e largimit nga televizioni i mbrëmjes, por pa njoftuar ndonjë vendim përfundimtar.
Raportimi i Page Six sugjeron se një vendim i mundshëm nuk do të lidhej me përplasjet e Kimmel me Donald Trumpin apo komentet e tij politike. Megjithatë, deri tani nuk ka asnjë konfirmim zyrtar se “Jimmy Kimmel Live!” do të përfundojë në vitin 2027.
Burimi;https://www.instagram.com/jimmykimmellive/?hl=en
Foto; https://www.instagram.com/jimmykimmellive/?hl=en