Modelja e njohur dhe ylli i reality show-ve, Kendall Jenner, ka folur hapur për përvojën e saj me ankthin dhe vështirësitë e shëndetit mendor, duke i inkurajuar njerëzit të ndajnë historitë e tyre.

Në një intervistë për “Good Morning America”, Jenner tha se është përfshirë në nismën “The Mental Health Coalition”, e cila bashkon figura publike, influencues, organizata jofitimprurëse dhe marka të ndryshme për të ndryshuar mënyrën se si flitet për shëndetin mendor.

Kendall mbështet sfidën në rrjetet sociale, #howareyoureallychallenge, përmes së cilës njerëzit ftohen të publikojnë video në Instagram dhe të tregojnë sinqerisht si po ndihen, si edhe përvojat e tyre personale me ankthin, izolimin apo vështirësi të tjera emocionale.

“Shpresoj që njerëzit të mos ndihen aq vetëm”, u shpreh Kendall gjatë intervistës me Michael Strahan.

Ajo shtoi se për shkak të përballjeve të saj personale me shëndetin mendor, ishte e gatshme të bëhej pjesë e këtij projekti. Jenner ka folur edhe më herët për ankthin që ka përjetuar, duke theksuar rëndësinë e kërkimit të ndihmës dhe të bisedave të hapura për mirëqenien emocionale.