Këngëtarja Eli Fara ka ndarë një histori të pazakontë nga një dasmë ku ishte angazhuar për të kënduar. E ftuar në emisionin “Live me Luizin”, ajo tregoi se mënyra si një familjar drejtonte festën e kishte shtyrë të largohej.
Sipas rrëfimit të saj, dasma zhvillohej në drekë, gjatë verës, në një ambient pranë aeroportit. Këngëtarja ishte zgjuar herët, kishte shkuar në parukeri dhe ishte përgatitur për të marrë pjesë.
Por, sapo mbërriti dhe pa mënyrën si po organizohej festa, Eli Fara nisi të pyeste muzikantët nëse kishte ardhur në dasmën e duhur.
Ajo tregoi se një person nga familja kishte marrë rolin e drejtuesit të dasmës dhe u jepte vazhdimisht urdhra të ftuarve se kur duhej të ngriheshin, të uleshin apo të kërcenin.
Pas pak minutash, këngëtarja vendosi të dilte nga ambienti. U tha muzikantëve se do të shkonte pak jashtë, por më pas mori makinën dhe u largua.
Eli Fara e rrëfeu episodin me humor, duke theksuar se e kishte marrë me sportivitet situatën.