Ben Affleck ka folur sërish me admirim për ish-bashkëshorten e tij, Jennifer Lopez! Duke vlerësuar përkushtimin, këmbënguljen dhe suksesin e saj në industrinë e argëtimit, në një intervistë për podcastin “The Moment”, aktori u shpreh se këngëtarja është një pioniere e vërtetë, e cila ka arritur të kapërcejë pengesa të shumta gjatë karrierës së saj.
“Është ndoshta njeriu më punëtor që kam njohur ndonjëherë”, deklaroi Affleck, duke shtuar se edhe pse e konsideron veten një person që punon fort, kur është pranë Lopez, arrin të kuptojë se sa i jashtëzakonshëm është përkushtimi i saj.
“Edhe nëse askush tjetër nuk beson tek unë, unë do të besoj te vetja”, ishte mesazhi që Affleck përdori për të përshkruar qëndrimin e Lopez gjatë rrugëtimit të saj.
Ai theksoi se këngëtarja ka marrë përsipër rreziqe të mëdha dhe ka investuar edhe paratë e saj për të çuar përpara projektet profesionale, duke e cilësuar suksesin e saj si të jashtëzakonshëm.
Ben Affleck dhe Jennifer Lopez u martuan në korrik të vitit 2022, por këngëtarja paraqiti kërkesën për divorc në gusht të vitit 2024, i cili u finalizua në janar të vitit 2025.
Megjithatë, marrëdhënia e tyre profesionale vazhdoi përmes filmit “Kiss of the Spider Woman”, të publikuar në vitin 2025, ku Affleck ishte producent përmes kompanisë Artists Equity, të themeluar së bashku me Matt Damon.