Skiatori alpin Jim Morrison ka ndarë historinë e humbjeve të rënda personale dhe të arritjes së tij historike në Everest, gjatë një bisede me Oprah Winfrey në “The Oprah Podcast”.
Sipas përshkrimit të episodit, të publikuar më 20 tetor 2026, Morrison është personi i parë që ka arritur majën e Everestit dhe më pas ka zbritur me ski në faqen veriore të malit, një sfidë që dukej e pamundur.
Gjatë intervistës, ai dhe Oprah diskutojnë për përgatitjen që kërkoi kjo zbritje, pas dy përpjekjeve të mëparshme për ngjitjen. Biseda ndalet te rrugëtimi drejt kësaj arritjeje, por edhe te tragjeditë që kanë shënuar jetën e tij.
Në vitin 2011, Morrison humbi bashkëshorten dhe fëmijët në një aksident ajror. Një tjetër humbje e rëndë pasoi në vitin 2022, kur partnerja e tij, skiatorja e njohur Hilaree Nelson, humbi jetën nga një ortek para syve të tij.
Në rrëfimin për Oprah, Morrison reflekton mbi këto ngjarje dhe mënyrën se si është përballur me dhimbjen e humbjes. Përvoja e tij personale dhe sfida në Everest përbëjnë dy temat qendrore të episodit.
Pjesë e bisedës është edhe regjisori fitues i çmimit Oscar, Jimmy Chin. Ai sjell këndvështrimin e ekipit që dokumentoi zbritjen historike dhe shpjegon përgatitjet për të filmuar këtë arritje në kushte të jashtëzakonshme.
Rrugëtimi i Morrison është në qendër të dokumentarit të ri “Everest: The Other Side”. Sipas njoftimit të publikuar në përshkrimin e episodit, filmi do të shfaqet në kinema dhe në sallat IMAX në mbarë botën duke nisur nga 30 tetori.
Burimi; https://www.instagram.com/jimmorrison/?hl=en
Foto; https://www.instagram.com/jimmorrison/