Spanja po përjeton një nga periudhat më të forta të turizmit në historinë e saj, teksa autoritetet dhe ekspertët e sektorit parashikojnë se vendi mund të kalojë për herë të parë shifrën e 100 milionë turistëve ndërkombëtarë brenda vitit 2026.
Rritja e fortë e turizmit vjen në një moment kur disa rajone të tjera, veçanërisht Lindja e Mesme, po përballen me humbje të mëdha ekonomike për shkak të anulimeve të fluturimeve dhe rënies së udhëtimeve ndërkombëtare. Kjo situatë duket se ka favorizuar destinacione të konsideruara më të sigurta dhe stabile, ku Spanja renditet ndër përfituesit kryesorë.
Sipas Institutit Kombëtar të Statistikave në Spanjë, vetëm gjatë muajit mars vendi priti 6.81 milionë turistë të huaj, një rritje prej 3.3% krahasuar me të njëjtën periudhë të vitit të kaluar. Ndërkohë, në tre muajt e parë të vitit 2026, Spanja ka mirëpritur gjithsej 17.51 milionë vizitorë, duke regjistruar rritje prej 2.5% në bazë vjetore.
Jo vetëm numri i turistëve, por edhe shpenzimet e tyre kanë arritur nivele rekord. Gjatë tremujorit të parë të vitit, të ardhurat nga turizmi kanë kaluar 25 miliardë euro, ndërsa vetëm në mars turistët shpenzuan rreth 9.6 miliardë euro, ose 5.4% më shumë se një vit më parë.
Ekspertët e turizmit vlerësojnë se tensionet dhe pasiguria në destinacione konkurruese si Egjipti, Turqia apo disa vende të Lindjes së Mesme kanë ndikuar në rritjen e interesit për Spanjën si destinacion kryesor europian.
Sipas një raporti të Zyrës së Çështjeve Ekonomike dhe Tregtare të Ambasadës Greke në Madrid, nëse trendi pozitiv vazhdon edhe gjatë sezonit veror, Spanja mund të thyejë rekord historik jo vetëm në numrin e turistëve, por edhe në të ardhurat totale nga sektori, të cilat mund të arrijnë deri në 143 miliardë euro.
Ndër tregjet që kanë shënuar rritjen më të madhe janë Amerika Latine dhe Shtetet e Bashkuara, ndërsa Mbretëria e Bashkuar, Gjermania dhe Franca vijojnë të mbeten burimet tradicionale kryesore të turistëve.
Ishujt Kanarie vazhdojnë të jenë destinacioni më i preferuar nga turistët e huaj, duke kryesuar si për muajin mars ashtu edhe për gjithë tremujorin e parë të vitit.
Autoritetet spanjolle theksojnë se rritja e shpenzimeve turistike me ritëm më të lartë sesa numri i vizitorëve tregon një model më cilësor dhe të qëndrueshëm të zhvillimit të turizmit, duke sjellë më shumë vlerë për ekonominë e vendit.
Burimi;https://www.reuters.com/world/europe/spain-track-hit-record-100-million-tourists-2026-2026-05-07/
Foto; Freepik.com