Ekspozimi në diell gjatë verës mund të ketë efekte të ndryshme në shëndetin e lëkurës, duke ndihmuar në përmirësimin e disa problematikave dermatologjike, por edhe duke përkeqësuar gjendje të tjera. Dermatologët paralajmërojnë se rrezatimi ultravjollcë duhet menaxhuar me kujdes, pasi ndikimi i tij ndryshon nga personi në person.
Sipas specialistëve të cituar nga media ndërkombëtare Healthline dhe American Academy of Dermatology, disa probleme si aknet mund të përmirësohen gjatë verës, pasi dielli ndihmon në tharjen e yndyrës së tepërt dhe reduktimin e inflamacionit. Gjithashtu, pacientët me psoriazë mund të përfitojnë nga ekspozimi i kontrolluar ndaj rrezeve UV, të cilat përdoren edhe në trajtime profesionale si fototerapia.
Megjithatë, ekspertët theksojnë se jo çdo sëmundje reagon pozitivisht ndaj diellit. Personat që vuajnë nga lupusi, vitiligo apo ata që ndjekin trajtime kundër kancerit mund të zhvillojnë ndjeshmëri të lartë ndaj rrezatimit dhe irritime serioze të lëkurës. Zonat pa pigment tek personat me vitiligo janë më të pambrojtura dhe digjen më shpejt nga dielli.
Dermatologët paralajmërojnë gjithashtu për rrezikun e pickimeve nga rriqnat gjatë muajve të nxehtë, të cilat mund të transmetojnë infeksione si sëmundja Lyme.
Specialistët rekomandojnë përdorimin e kremrave mbrojtës me SPF, hidratimin e vazhdueshëm dhe shmangien e ekspozimit në orët me rrezatim të lartë për të ruajtur shëndetin e lëkurës gjatë sezonit veror.
Burimi; https://www.healthline.com/
Foto; Freepik.com