Pas më shumë se tre dekadash eksperiencë në këshillimin e kompanive për lidershipin, zhvillimin e ekipeve dhe kulturën organizative, një psikolog dhe trajner profesionist ka ndarë reflektimin e tij mbi rëndësinë e sfidimit të vetes edhe kur konsiderohesh ekspert.
Ai tregon se së fundmi përfundoi një certifikim të ri në coaching, një proces që fillimisht nuk dëshironte ta ndiqte dhe për të cilin kishte dyshime nëse do t’ia vlente koha dhe energjia. Megjithatë, përvoja rezultoi shumë më transformuese sesa kishte menduar.
“Rreziku i ekspertizës është se fillon të duket si një gjendje e përhershme,” shprehet ai, duke cituar edhe arkitektin Frank Lloyd Wright: “Eksperti është njeriu që ka ndaluar së menduari.”
Sipas tij, problemi nuk është se ekspertët nuk mendojnë më, por se ndalojnë së vëni në dyshim mënyrën se si mendojnë dhe punojnë.
Autori rrëfen se pas marrjes së doktoraturës në psikologji, karriera e tij mori hov dhe ai u konsiderua si ekspert në fushë. Për vite me radhë, metodat dhe proceset e tij nuk u sfiduan më nga askush. Pikërisht kjo krijoi atë që ai e quan “iluzioni i eksperiencës”.
“Eksperienca ime ishte reale, por me kalimin e kohës ajo ishte kthyer në teknikë. I bëja gjërat siç i kisha bërë gjithmonë,” shkruan ai.
Një nga momentet më të vështira ishte pranimi se siguria profesionale mund të të bëjë më pak kritik ndaj vetes. Procesi i certifikimit e detyroi të rikthehej te mënyra si analizonte situatat, si merrte vendime dhe sa shpejt arrinte në përfundime.
Ai pranon gjithashtu se për vite kishte parë me skepticizëm botën e coaching-ut, duke qenë se psikologët dhe coach-et historikisht kanë pasur qasje të ndryshme profesionale. Megjithatë, vendimi për të ndjekur certifikimin e International Coaching Federation (ICF) ndryshoi perspektivën e tij.
Në fund të procesit, ai arriti në përfundimin se vlera më e madhe nuk ishte vetë diploma apo titulli, por gatishmëria për t’u vlerësuar dhe për të pranuar një shqyrtim të sinqertë profesional.
“Ekspertiza fitohet, por duhet edhe të ruhet. Dhe ndonjëherë, duhet të sfidohet,” përfundon ai.
Burimi;https://www.psychologytoday.com/us/blog/the-psychology-of-work/202605/if-youre-an-expert-heres-why-you-should-go-back-to-class
Foto; Freepik.com