Një studim i publikuar në revistën Psychological Science ka nxjerrë në pah një fakt surprizues: këshillat që u japim njerëzve me qëllim të mirë jo gjithmonë i ndihmojnë ata dhe në disa raste mund t’i bëjnë të ndihen edhe më keq.
Sipas studiuesve, shumica e njerëzve kanë tendencën të japin menjëherë zgjidhje kur dikush u tregon një problem personal, pa u siguruar më parë nëse personi tjetër ka nevojë për këshillë apo thjesht dëshiron të dëgjohet.
Eksperimentet treguan se mbështetja emocionale funksionon vetëm kur personi që ndihmon arrin të kuptojë realisht nevojat dhe ndjenjat e tjetrit. Në të kundërt, këshillat e shpejta mund të krijojnë ndjesinë se personi “nuk po e menaxhon siç duhet situatën”.
Një tjetër studim i publikuar në Journal of Social and Personal Relationships zbuloi se rreth 70% e njerëzve japin këshilla edhe kur nuk u kërkohen. Studiuesit theksojnë se kjo ndodh sidomos mes njerëzve të afërt, pasi instinkti për të “zgjidhur problemin” aktivizohet menjëherë kur shohim dikë që vuan.
Sipas ekspertëve, këshillat e pakërkuara mund të rrisin ndjenjat e stresit, vetmisë apo pasigurisë tek personat që po kalojnë periudha të vështira. Ata sugjerojnë që në vend të zgjidhjeve të menjëhershme, njerëzit të ofrojnë më shumë dëgjim, mirëkuptim dhe mbështetje emocionale.
Psikologët rekomandojnë një pyetje të thjeshtë para se të japim mendimin tonë: “Dëshiron të të ndihmoj me një zgjidhje apo thjesht ke nevojë të flasësh?”