Kërkimi, i udhëhequr nga psikologia Alicia Grandey dhe ekipi i saj, analizoi të dhënat e 1,592 punonjësve në Shtetet e Bashkuara. Studiuesit u përqendruan te fenomeni i njohur si “surface acting”, i cili përshkruan situatat kur punonjësit duhet të shfaqin emocione pozitive, si buzëqeshja apo mirësjellja, edhe kur në realitet ndihen të stresuar, të lodhur ose të pakënaqur.
Sipas rezultateve, përpjekja e vazhdueshme për të kontrolluar dhe fshehur emocionet konsumon energjinë psikologjike dhe dobëson vetëkontrollin. Kjo mund të ndikojë në sjelljet e individëve pas punës, duke i bërë ata më të prirur ndaj konsumit të tepruar të alkoolit.
Megjithatë, studiuesit theksojnë se efekti nuk është i njëjtë për të gjithë. Ai rezultoi më i ulët te personat që gëzojnë më shumë autonomi në vendin e punës, kanë më pak prirje impulsive ose e konsiderojnë punën e tyre të rëndësishme dhe me ndikim pozitiv në shoqëri.
Gjetjet kanë hapur debat mbi kulturën e disa kompanive që kërkojnë nga stafi të ruajë vazhdimisht një imazh pozitiv dhe të gëzuar. Ekspertët nënvizojnë se mirëqenia emocionale e punonjësve duhet të jetë prioritet, pasi presioni për të fshehur ndjenjat reale mund të ketë pasoja afatgjata për shëndetin mendor dhe jetën personale.