Një mesazh i shkruar bukur dikur mund të merrej si shenjë kujdesi. Sot, për disa njerëz, ai mund të ngrejë edhe një pyetje: a e shkroi vërtet personi që e dërgoi? Këtë ndryshim në mënyrën si i lexojmë fjalët e të tjerëve e trajton psikologu Eric Solomon në një artikull për Psychology Today.

Solomon tregon se, pasi një redaktore i kishte thënë se përdorimi i vizës së gjatë mund ta bënte një tekst të dukej si i krijuar nga AI, ai nisi të hiqte këtë shenjë pikësimi edhe nga fjalitë që i kishte shkruar vetë. Në një rast tjetër, kur mori një mesazh të ngrohtë dhe të menduar mirë nga një mik, për një çast dyshoi nëse miku i kishte zgjedhur vetë fjalët. 

Sipas autorit, ky dyshim mund të ndikojë në marrëdhënie: një tekst i kujdesshëm rrezikon të duket i ftohtë ose i pandjerë vetëm sepse është tepër i përpunuar. Megjithatë, ai thekson se forma e një mesazhi nuk tregon me siguri as kush e shkroi, as sa të sinqerta janë ndjenjat pas tij.

Artikulli përmend edhe një studim ku pjesëmarrësit i vlerësuan më ashpër dërguesit kur u tha se mesazhet ishin krijuar nga AI. Kur nuk iu dha informacion për autorësinë, ata prirën t’u besonin mesazheve. Kjo sugjeron se etiketa “e shkruar nga AI” mund të ndryshojë perceptimin për dërguesin, edhe kur përmbajtja e mesazhit është e njëjtë Për Solomonin, një fjali e rrjedhshme apo një shenjë pikësimi nuk mjafton për të gjykuar nëse dikush është treguar i sinqertë. Një person mund të ketë kërkuar ndihmë për t’i formuluar fjalët dhe, sërish, t’i ketë ndier ato që ka shkruar.