Ed Sheeran kujton momentin kur mësoi për kancerin e gruas: “Ishte dita më e keqe e jetës sime”

Këngëtari britanik Ed Sheeran ka rrëfyer një nga periudhat më të vështira të jetës së tij, kur mësoi se gruaja e tij, Cherry Seaborn, ishte diagnostikuar me kancer. Artisti e përshkroi atë moment si “ditën më të keqe të jetës së tij”.

Në një intervistë në podkastin Friends Keep Secrets, Sheeran kujtoi telefonatën që mori nga bashkëshortja në shkurt të vitit 2022, kur mjekët zbuluan një tumor te Cherry, ndërsa ajo ishte gjashtë muajshe shtatzënë me vajzën e tyre të dytë, Jupiter.

Ai tregoi se situata ishte edhe më e vështirë sepse mjekët nuk mund të ndërhynin menjëherë për shkak të shtatzënisë. Për këtë arsye, trajtimi dhe operacioni për heqjen e tumorit u shtynë deri pas lindjes së vajzës së tyre.

Sheeran rrëfeu se ajo periudhë ishte jashtëzakonisht e rëndë për të, pasi përkoi edhe me ngjarje të tjera tragjike në jetën e tij, përfshirë vdekjen e dy miqve të afërt dhe një proces gjyqësor për këngën “Shape of You”, në të cilin ai akuzohej për plagjiaturë.

Pavarësisht vështirësive, këngëtari dha një lajm të mirë për shëndetin e bashkëshortes. Pas lindjes së vajzës, Cherry iu nënshtrua operacionit për heqjen e tumorit dhe sot ajo është në gjendje të mirë shëndetësore.

Sheeran ka treguar se kjo përvojë e vështirë ndikoi shumë edhe në muzikën e tij, duke u bërë një nga frymëzimet kryesore për albumin “Subtract”, ku trajton tema si humbja, ankthi dhe shëndeti mendor.

 Burimi: https://people.com/ed-sheeran-gives-health-update-wife-cherry-seaborn-cancer-diagnosis-11925462