Sharon Stone flet për herë të parë për një sulm fizik: “Jam e sigurt se e di kush ma bëri”

Aktorja e njohur e Hollywood-it, Sharon Stone, ka rikujtuar një ngjarje të rëndë që përjetoi një dekadë më parë, duke zbuluar se ishte viktimë e një sulmifizik, për të cilin beson se e di se kush qëndron pas tij.

Gjatë një paraqitjeje në podcast-in “The Person Who Believed in Me”, të drejtuar nga gazetari i CBS, David Begnaud, ylli i filmit Basic Instinct foli për herë të rrallë mbi incidentin që e la pa ndjenja.

“Nuk e di sa shumë mund të them për këtë, por më goditën nga pas. Nuk e dija vërtet çfarë më ndodhi. Isha pa ndjenja në dysheme. Nuk e di si arrita atje”, u shpreh Stone.

Pas ngjarjes, aktorja kërkoi ndihmë mjekësore për shkak të dhimbjeve të forta në qafë dhe shpatulla. Sipas saj, ekzaminimet zbuluan dëmtime serioze që ngritën dyshime të forta për një sulm të dhunshëm.

“Shkova në klinikë sepse kisha shumë probleme me pjesën e pasme të qafës dhe shpatullave. Ata më bënë rreze X dhe mjeku më tha se gjoksi im ishte thyer plotësisht. Ai tha se ishte e qartë se isha sulmuar dhe se ajo që më ndodhi ishte një akt kriminal”, tregoi aktorja.

Megjithëse deklaroi se ka bindjen se e di identitetin e personit që e sulmoi, Sharon Stone refuzoi të bëjë emra publikisht.

“Nuk do ta them publikisht, por ne e raportuam dhe bëmë gjithçka. Pata mundësinë të paraqes një raport dhe, duke qenë se kanë kaluar 10 vjet dhe unë jam një figurë publike, vendosa të mos e bëj. Jam mjaft e sigurt se e di kush ma bëri këtë”, tha ajo.

Rrëfimi i aktores ka ngjallur interes të madh në mediat ndërkombëtare, pasi Stone nuk kishte folur më parë në detaje për këtë incident misterioz që ndikoi në jetën e saj personale dhe profesionale.