Pete Davidson ka dalë publikisht në mbështetje të ish-të fejuarës së tij, Ariana Grande, duke shprehur pakënaqësinë e tij ndaj komenteve negative që këngëtarja ka marrë së fundmi për pamjen e saj.
Edhe pse dyshja i ka dhënë fund lidhjes prej vitesh, aktori dhe komediani theksoi se vazhdon ta konsiderojë Grande një person shumë të fortë dhe jashtëzakonisht të talentuar.
Në një intervistë për Variety, Davidson foli për diskutimet publike rreth këngëtares, ndërsa shumë njerëz kanë komentuar së fundmi për pamjen e saj dhe siluetën e saj të dobët.
“Nuk më pëlqen aspak. Nuk është e drejtë. Ajo është një person shumë i fortë, e kam parë nga afër dhe nuk e kuptoj”, u shpreh ai.
Aktori shtoi se Grande ka mësuar të përballet me presione të tilla, pasi prej vitesh ndodhet në qendër të vëmendjes së publikut.
“Ajo di si t’i përballojë situata të tilla. Ka vite në këtë industri. Do të jetë mirë, por mendoj se e gjithë kjo është e papranueshme”, deklaroi Davidson.
Lidhja e tyre zgjati vetëm disa muaj
Ariana Grande dhe Pete Davidson nisën lidhjen e tyre në vitin 2018 dhe u fejuan vetëm pak muaj më vonë, përpara se të ndaheshin në tetor të po atij viti.
Ndarja e tyre erdhi në një periudhë veçanërisht të vështirë për këngëtaren, pak kohë pas vdekjes së ish-partnerit të saj, reperit Mac Miller.
Pas ndarjes, dyshja shkëmbeu disa komente të ashpra, megjithatë Davidson ka bërë të qartë se sot nuk ka më tension mes tyre.
“Mendoj se Ariana është e mrekullueshme, jashtëzakonisht e talentuar dhe një vajzë e shkëlqyer. Nuk shkëmbejmë mesazhe apo diçka të tillë, por jemi mirë”, tha ai.
Davidson foli gjithashtu për këngën “Thank U, Next”, në të cilën Grande i referohet edhe marrëdhënies së tyre. Me humor, ai tha se ndoshta duhet të ekzistojë një “grup” për ish-partnerët e personazheve të famshëm që janë bërë frymëzim për këngë të mëdha ndarjeje.