Pas suksesit të jashtëzakonshëm në “Air Albania Stadium” në Tiranë, këngëtari i dashur shqiptar Alban Skënderaj ka njoftuar një tjetër ngjarje të madhe për fansat e tij. Koncerti “Motiv i jetës time” do të mbahet më 14 maj 2025 në Milano, Itali, në sallën prestigjioze të “Unipol Forum”.
Skënderaj, përmes postimeve në rrjetet sociale, ka shprehur entuziazmin dhe krenarinë për këtë arritje të madhe. Ai thekson se kjo është një mundësi për të sjellë një shfaqje me përmasa ndërkombëtare për shqiptarët dhe për të përfaqësuar denjësisht komunitetin shqiptar në Itali, i cili ka luajtur një rol të rëndësishëm në formimin e tij si artist dhe si njeri.
“Pranvera do të vijë e dielli do të dalë sërish!” – këto ishin fjalët e këngëtarit, të cilat shoqëruan njoftimin për këtë ngjarje, duke i dhënë një mesazh shprese dhe gëzimi ndjekësve të tij.
Biletat dhe detajet e tjera të koncertit pritet të publikohen së shpejti, ndërsa pritshmëritë janë të mëdha për këtë shfaqje të parë të këtij lloji nga një artist shqiptar në një prej sallave më të njohura të Europës.
Burimi i artikullit: https://www.instagram.com/albanskenderaj/
Burimi i fotos: https://www.instagram.com/p/C9IPrK7tyQQ/