Ja si ta kuptoni që edukimi juaj ka lënë gjurmë tek fëmijët , shenjat që tregojnë suksesin tuaj si prind
Një ndër shqetësimet kryesore të prindërve është fakti se a po i edukojnë si duhet fëmijët e tyre?
Shpesh të qënit prindër shoqërohet me pasiguri dhe ndjenja faji a po e bëj si duhet?
A po e kryej si duhet misionin tim si prind?
Edhe pse nuk ka një formulë perfekte për edukimin, ekspertët bien dakord se ka disa shenja të qarta që tregojnë se puna e një prindi po jep rezultate dhe se fëmijët po rriten në një ambient të shëndetshëm emocional dhe psikologjik.
Një nga treguesit më të fortë është fakti që fëmija ndihet i sigurt për të shprehur emocionet e tij. Kur një fëmijë nuk ka frikë të tregojë gëzim, zemërim apo trishtim para prindërve, kjo do të thotë se ai ndjehet i kuptuar dhe i pranuar.
Sipas ekspertëve, kjo është një shenjë e një lidhjeje të fortë dhe të shëndetshme, ku fëmija e di se mund të jetë vetvetja pa u gjykuar.
Një tjetër sinjal pozitiv është kur fëmija i drejtohet prindit në momentet e vështira. Nëse ai vjen tek ju kur ka një problem, një frikë apo një pasiguri, kjo tregon se ju keni krijuar një marrëdhënie besimi dhe sigurie. Kjo lidhje konsiderohet themelore për zhvillimin emocional dhe për mënyrën se si fëmija do të ndërtojë marrëdhënie në të ardhmen.
Po ashtu, një edukim i mirë reflektohet edhe në sjelljen e përditshme të fëmijës. Fëmijët që rriten me kujdes dhe mbështetje kanë më shumë gjasa të jenë të pavarur, të përgjegjshëm dhe të aftë për të krijuar marrëdhënie të shëndetshme me të tjerët. Studimet tregojnë se një stil prindërimi i balancuar ndihmon në zhvillimin e vetëbesimit, aftësive sociale dhe suksesit në shkollë.
Një shenjë tjetër e rëndësishme është empatia. Fëmijët që tregojnë mirëkuptim për ndjenjat e të tjerëve dhe sillen me respekt janë shpesh rezultat i një edukimi ku u është mësuar të dëgjojnë dhe të kuptojnë emocionet.
Kjo lidhet drejtpërdrejt me mënyrën se si prindërit komunikojnë dhe reagojnë ndaj tyre çdo ditë.
Gjithashtu, fëmijët që janë të qetë emocionalisht dhe kanë pak probleme në sjellje shpesh vijnë nga një ambient ku prindërimi është i qëndrueshëm dhe pozitiv. Sipas studimeve, një qasje e tillë ndihmon në përmirësimin e shëndetit mendor, uljen e problemeve të sjelljes dhe rritjen e suksesit akademik.
Në të njëjtën kohë, ekspertët theksojnë se edukimi i mirë nuk do të thotë që fëmija të jetë gjithmonë i lumtur apo pa probleme. Përkundrazi, një fëmijë që përjeton emocione të ndryshme dhe di t’i menaxhojë ato është shenjë e një zhvillimi të shëndetshëm emocional. Aftësia për t’u rikthyer pas vështirësive dhe për të mësuar nga gabimet është një nga treguesit më të fortë të një edukimi të mirë.
Në fund, ajo që ka më shumë rëndësi nuk është perfeksioni i prindit, por lidhja që krijon me fëmijën. Një marrëdhënie e bazuar në dashuri, respekt dhe komunikim është baza për një zhvillim të shëndetshëm dhe për një të ardhme të qëndrueshme.
Burimi: https://www.parent.com/blogs/conversations/2023-7-signs-youre-an-awesome-parent
Foto: Freepik.com