Studimi: Truri i grave ndryshon gjatë shtatzënisë për t’i përgatitur për amësinë

Një studim i ri shkencor sugjeron se shtatzënia sjell ndryshime të rëndësishme në strukturën e trurit të grave, të cilat mund t’i ndihmojnë ato të përgatiten më mirë për kujdesin ndaj foshnjës.

Prej kohësh përdoret shprehja “baby brain” për të përshkruar idenë se gratë gjatë shtatzënisë bëhen më harruese ose më pak të përqendruara. Megjithatë, studimi më i madh i realizuar deri tani në këtë fushë tregon se ndryshimet në tru nuk janë domosdoshmërisht negative.

Sipas hulumtimit, lënda gri e trurit pjesa e pasur me qeliza nervore që lidhet me përpunimin e informacionit, emocionet dhe empatinë zvogëlohet mesatarisht rreth 5% gjatë shtatzënisë. Shkencëtarët thonë se kjo mund të jetë një mënyrë se si truri riorganizohet për të përgatitur nënat për rolin e ri.

Studimi u realizua nga një ekip studiuesish në Spanjë dhe përfshiu 127 gra shtatzëna, të cilave iu bënë skanime të trurit para, gjatë dhe pas shtatzënisë. Rezultatet u krahasuan edhe me skanimet e një grupi më të vogël grash që nuk ishin shtatzëna.

Rezultatet treguan se sa më të mëdha të ishin ndryshimet në tru, aq më shumë gratë raportonin se ndiheshin të lidhura emocionalisht me foshnjat e tyre dhe se krijonin një marrëdhënie më të fortë me to.

Profesoresha Susana Carmona, drejtoreshë e laboratorit NeuroMaternal në Institutin e Kërkimeve Shëndetësore Gregorio Marañón në Madrid, shpjegon se këto ndryshime mund të jenë pjesë e një procesi natyror të adaptimit të trurit për amësinë.

Ajo e krahason këtë proces me krasitjen e një peme, ku disa degë priten në mënyrë që pema të rritet më mirë dhe më efikas.

Sipas saj, shtatzënia ndryshon shumë organe të trupit , për shembull, zemra e nënës mund të zmadhohet dhe kapaciteti i mushkërive mund të rritet – ndaj është e arsyeshme që edhe truri të pësojë ndryshime gjatë kësaj periudhe.

“Ne nuk duhet të fokusohemi vetëm tek ideja se gratë mund të kenë pak vështirësi me kujtesën gjatë shtatzënisë. Nënat e reja mësojnë një sërë aftësish të reja,” thotë ajo.

Gjatë studimit, gratë shtatzëna në Madrid dhe Barcelonë iu nënshtruan pesë skanimeve MRI, bënë analiza hormonale dhe plotësuan pyetësorë për të përshkruar ndryshimet emocionale gjatë dhe pas shtatzënisë.

Për krahasim, studiuesit analizuan edhe trurin e 52 grave që nuk kishin qenë kurrë shtatzëna, mes tyre edhe disa partnere të grave që merrnin pjesë në studim. Shkencëtarët theksojnë se edhe pse shtatzënia mund të ndikojë në tru, prindërimi nuk kufizohet vetëm tek përvoja biologjike e shtatzënisë.

“Ka shumë mënyra për të qenë prind dhe nuk është e nevojshme të kesh qenë shtatzënë për të qenë një prind i mirë,” theksoi Carmona.

Studiuesit thonë se nevojiten më shumë kërkime për të kuptuar më mirë ndryshimet që ndodhin në tru gjatë kësaj periudhe të rëndësishme në jetën e grave.

Burimi: https://www.bbc.com/news/articles/cy0d59e7wjlo

Foto:Freepik.com