Arrijnë marrëveshje pas divorcit, Sia do të paguajë 42,500 dollarë në muaj për djalin e saj

Këngëtarja e njohur ndërkombëtare Sia Furler dhe ish-bashkëshorti i saj Daniel Bernad kanë arritur një marrëveshje ligjore lidhur me kujdestarinë dhe mbështetjen financiare për djalin e tyre, Somersault Wonder Bernad, i lindur në mars të vitit 2024.

Sipas dokumenteve të depozituara në gjykatën e Los Angeles, Sia është detyruar të paguajë 42,500 dollarë në muaj si mbështetje për fëmijën. Kjo pagesë do të vazhdojë deri sa djali të mbushë 18 vjeç, ose deri në përfundimin e shkollës së mesme nëse ai vazhdon studimet deri në moshën 19-vjeçare. Në disa raste të veçanta, si emancipimi apo vendime të tjera gjyqësore, pagesa mund të ndërpritet më herët.

Përveç kësaj shume mujore, artistja do të mbulojë edhe shpenzime të tjera të rëndësishme, përfshirë tarifat e shkollimit privat, aktivitetet jashtëshkollore si dhe kostot e kujdesit shëndetësor që nuk mbulohen nga sigurimi. Ajo gjithashtu do të vazhdojë të mbajë sigurimin shëndetësor për të birin.

Një tjetër detaj i rëndësishëm i marrëveshjes është sigurimi i së ardhmes financiare të fëmijës. Sia duhet të mbajë një policë sigurimi jete me vlerë 5 milionë dollarë ose të krijojë një fond (trust) me të njëjtën vlerë në favor të djalit.

Marrëveshja përfshin gjithashtu kujdestari të përbashkët ligjore, si dhe një plan të detajuar për kujdestarinë fizike, që përfshin ndarjen e kohës gjatë fundjavave, festave dhe pushimeve shkollore.

Kjo zhvillim vjen në një kohë kur çifti është ende në proces divorci, pasi Sia kishte paraqitur kërkesën për ndarje në mars të vitit 2025, vetëm një vit pas lindjes së djalit. Ndërkohë, çështjet e tjera financiare mes tyre janë zgjidhur më herët, duke çuar në këtë marrëveshje që i jep fund përkohësisht një pjese të konfliktit mes tyre.

Burimi: https://www.instagram.com/sia_.furler/?hl=en

Foto: https://www.instagram.com/sia_.furler/?hl=en