Maddox heq mbiemrin “Pitt”, djali i Angelina Jolie dhe Brad Pitt prezantohet vetëm me mbiemrin e nënës
Djali i madh i yjeve të Hollywood-it, Angelina Jolie dhe Brad Pitt, ka vendosur të mos përdorë më mbiemrin e babait të tij në angazhimet profesionale. Maddox, 24 vjeç, është shfaqur në kreditet e filmit të ri të Angelina Jolie me emrin Maddox Jolie, duke lënë jashtë pjesën “Pitt”.
Sipas mediave ndërkombëtare, në projektet e mëparshme ai ishte prezantuar si Maddox Jolie-Pitt, ndërsa ky ndryshim i fundit ka tërhequr menjëherë vëmendjen e publikut dhe mediave rozë. Maddox ka punuar si asistent regjisor në filmin e fundit të nënës së tij, duke vazhduar përfshirjen në industrinë e filmit, por këtë herë me një identitet të ri profesional.
Ky veprim shihet si domethënës, sidomos në kontekstin e marrëdhënieve të raportuara si të tensionuara mes Brad Pitt dhe disa prej fëmijëve të tij, pas divorcit të bujshëm me Angelina Jolie. Çifti, i cili ishte një nga më të famshmit në Hollywood, u nda në vitin 2016, ndërsa procesi i divorcit dhe çështjet ligjore që pasuan zgjatën për vite me radhë.
Maddox nuk është i vetmi nga fëmijët e çiftit që ka zgjedhur të distancohet nga mbiemri “Pitt” në paraqitjet publike. Mediat raportojnë se edhe disa prej motrave dhe vëllezërve të tij kanë përdorur vetëm mbiemrin “Jolie” në aktivitete artistike apo akademike. Në raste të caktuara, ndryshimi i emrit është bërë edhe zyrtarisht.
Angelina Jolie dhe Brad Pitt janë prindër të gjashtë fëmijëve: Maddox, Pax, Zahara, Shiloh dhe binjakëve Knox dhe Vivienne. Që nga ndarja, Jolie ka qenë figura kryesore në jetën e përditshme të fëmijëve, ndërsa raportet për marrëdhënien e tyre me Pitt kanë qenë subjekt i vazhdueshëm i mediave.
Ndryshimi i mbiemrit nga ana e Maddox konsiderohet një vendim personal dhe profesional, por që në të njëjtën kohë ka nxitur diskutime të shumta për dinamikat brenda familjes së njohur. Deri më tani, as Maddox dhe as prindërit e tij nuk kanë bërë një deklaratë publike lidhur me këtë vendim.
Burimi: https://pagesix.com/2026/02/26/celebrity-news/angelina-jolie-and-brad-pitts-son-maddox-drops-dads-famous-last-name/
Foto: https://www.instagram.com/angelinajolie/