Këngëtarja e njohur e pop-it, Britney Spears, është arrestuar këtë javë në Westlake Village, Kaliforni, nën dyshimin për drejtim automjeti nën ndikimin e alkoolit (DUI). Sipas mediave amerikane, gjatë kontrollit në makinën e saj janë gjetur edhe disa pilula, të cilat janë dërguar për analiza laboratorike për të përcaktuar nëse përmbajnë substanca narkotike.
Raportohet se nëse analizat konfirmojnë praninë e drogës, Spears mund të përballet me akuza shtesë për posedim droge dhe drejtim nën ndikimin e substancave (DUID). Ekspertët ligjorë theksojnë se në raste të tilla dënimet mund të përfshijnë burg nga 48 orë deri në mbi një vit, gjoba të konsiderueshme dhe pezullim të patentës së drejtimit.
Megjithatë, sipas avokatit amerikan Tre Lovell, nëse pilulat rezultojnë të jenë pa përmbajtje narkotike dhe në mungesë të rrethanave rënduese – si aksident, dëmtime prone apo nivel shumë i lartë alkooli – këngëtarja ka pak gjasa të përballet me burg.
Ai shtoi se në rast se kjo është shkelja e parë për drejtim nën ndikim, Spears mund të përballet më shumë me masa si periudhë prove, gjobë, ndjekje kursesh edukative dhe pezullim të patentës, në varësi të vendimit të autoriteteve.
Rezultatet e analizave laboratorike ende nuk janë publikuar, ndërsa autoritetet do të shqyrtojnë të gjitha rrethanat përpara se të vendosin për ngritjen e mundshme të akuzave ndaj këngëtares.
Burimi:https://www.bbc.com/news/articles/c4gjjn41l7no
Foto;https://www.instagram.com/britney1spears/