Pak ditë para ceremonisë së madhe të çmimeve Oscar, komediani dhe prezantuesi Conan O’Brien është parë në një moment të pazakontë jashtë Teatrit Dolby në Los Angeles, duke ndihmuar në shtrimin e tapetit të kuq ku do të parakalojnë yjet e Hollywood-it.
O’Brien, i cili këtë vit rikthehet për herë të dytë si prezantues i ceremonisë së Oscars, u bashkua për pak momente me ekipin që po përgatiste ambientin për eventin prestigjioz. Ai shtroi një pjesë të tapetit të kuq, bëri shaka me punëtorët dhe gazetarët e pranishëm dhe nuk ngurroi të pozonte para kamerave.
Me stilin e tij karakteristik humoristik, komediani tha se publiku duhet të përgatitet për një ceremoni plot surpriza.
“Kemi planifikuar shumë gjëra argëtuese. Po i provojmë dhe po shohim si funksionojnë gjatë provave. Shpresoj që për natën e së dielës të kemi disa momente vërtet të veçanta”, u shpreh ai.
I pyetur nga gazetarët nëse organizatorët i kishin kërkuar të shmangte disa tema gjatë prezantimit, O’Brien u përgjigj me humor se ndonjëherë lindin diskutime të vogla, por gjithmonë arrijnë të gjejnë një zgjidhje.
“Herë pas here ka disa mosmarrëveshje, por në fund i zgjidhim. Gjithmonë ia dalim”, tha ai.
Conan O’Brien është një nga figurat më të njohura të televizionit amerikan, i famshëm për drejtimin e emisioneve të natës si “Late Night with Conan O’Brien”, “The Tonight Show with Conan O’Brien” dhe “Conan”.
Përveç prezantimit të ceremonisë së Oscars, ai ka edhe një rol në dramën “If I Had Legs I’d Kick You”. Në këtë film luan edhe aktorja Rose Byrne, e cila këtë vit ka marrë nominimin e saj të parë për Oscar, duke garuar për çmimin “Aktorja më e mirë” në edicionin e këtij viti të çmimeve të Akademisë.
Ceremonia e Oscars pritet të mbledhë edhe një herë emrat më të mëdhenj të industrisë së filmit, ndërsa tapeti i kuq në Los Angeles do të jetë sërish qendra e vëmendjes së mediave dhe fansave nga e gjithë bota.
Burimi: https://abc7chicago.com/post/oscars-countdown-conan-obrien-helps-roll-iconic-red-carpet-ahead-2026/18703504/
Foto: https://www.instagram.com/teamcoco/?hl=en