Ajo që nisi si një blerje e rastësishme në një panair antikesh në Boston, u shndërrua në një pasion që zgjati prej më shumë se katër dekadash. David dhe Nan Skier, një çift nga Alabama e SHBA-ve, kanë krijuar atë që konsiderohet koleksioni më i madh në botë i bizhuterive të rralla të njohura si “Lover’s Eyes”, miniatura me sy të pikturuar që simbolizonin dashurinë, besnikërinë dhe kujtimin.
Gjithçka nisi kur David, një okulist tashmë në pension, vuri re një unazë të veçantë me një sy të pikturuar, të rrethuar nga smalt blu, diamante dhe perla. Kurioziteti për historinë e saj i shtyu të mësonin më shumë për këto objekte të rralla dhe të fillonin koleksionimin e tyre.
Sot, koleksioni i tyre numëron 158 objekte, mes tyre unaza, karfica, byzylykë, kuti, filxhanë çaji dhe aksesorë të tjerë, të cilët datojnë kryesisht nga fundi i shekullit XVIII dhe fillimi i shekullit XIX. Çifti beson se zotëron koleksionin më të madh të këtij lloji në botë, i cili është ekspozuar në muze dhe është dokumentuar edhe në një libër, ndërsa një botim i ri pritet të dalë vitin e ardhshëm.
“Lover’s Eyes” u bënë të famshme në Anglinë gjeorgjiane, pasi Princi i Uellsit, George IV, i dërgoi të dashurës së tij sekrete, Maria Fitzherbert, një miniaturë me syrin e tij si shenjë dashurie. Ky gjest romantik u kthye shpejt në modë mes aristokracisë britanike, ku portretet e syve vendoseshin në bizhuteri të çmuara dhe shkëmbeheshin si dhurata intime.