Këngëtarja me origjinë shqiptare, Bebe Rexha, ka qenë së fundmi e ftuar në emisionin e Angie Martinez, ku ka folur për rrugëtimin e saj në muzikë, bashkëpunimet e rëndësishme dhe disa momente nga jeta personale.
Artistja, e nominuar për çmimet Grammy, ka kujtuar fillimet e saj në New York, ku punonte si kantautore dhe shkruante këngë për artistë të tjerë, përpara se të vendoste të zhvendosej në Los Angeles për të ndërtuar karrierën e saj si interpretuese.
Gjatë bisedës, Bebe Rexha ka ndarë edhe emocionet për bashkëpunimin me legjendën e muzikës country, Dolly Parton, në këngën “Seasons”. Kjo përvojë, sipas saj, ishte një moment i veçantë në karrierën e saj.
Këngëtarja është ndalur gjithashtu te një episod që ka ngjallur kureshtje te publiku: mesazhi që i kishte dërguar reperit Drake në rrjetet sociale. Ajo ka treguar se kishte marrë vetë iniciativën për t’i shkruar, duke e bërë bisedën edhe më të sinqertë dhe argëtuese.
Në intervistë, Bebe Rexha ka reflektuar mbi rrugën e saj nga një vajzë që shkruante këngë në New York, te një artiste e njohur ndërkombëtarisht, duke treguar se çdo hap i karrierës së saj ka ardhur përmes punës, këmbënguljes dhe besimit te vetja.