Një këngëtare nga Kosova, me inicialet E.A., ka bërë denoncim në polici lidhur me shpërndarjen e materialeve intime ku dyshohet se shfaqet kompozitori Adrian Hila.
Sipas Top Channel, këngëtarja ka dhënë deklaratën e saj për rrethanat e ngjarjes dhe ka denoncuar një person që, sipas saj, është përgjegjës për publikimin e pamjeve. Në dëshminë e saj, ajo ka përjashtuar Hilën si personin që i ka shpërndarë videot.
Raportimi bën të ditur se E.A. ka identifikuar me emër një prej personave që pretendon se ka nxjerrë fillimisht materialet në portale. Ky pretendim mbetet pjesë e verifikimeve nga autoritetet.
Në kuadër të hetimeve, policia ka marrë deklarimet e tri këngëtareve dhe të vetë kompozitorit. Hila ka pretenduar se pamjet janë marrë përmes hakerimit të kamerave të sigurisë në ambientet e tij private.
Sipas të njëjtit burim, kompozitori po hetohet në gjendje të lirë për dyshime lidhur me ndërhyrjen e padrejtë në jetën private.
Policia ka kontaktuar gjithashtu një këngëtar të ri, i cili ka deklaruar se marrëdhënia ka qenë konsensuale dhe ka nisur kur ai ishte në moshë madhore.
Materialet e çështjes janë referuar në Prokurorinë e Tiranës për dyshime që lidhen me përgjimin e paligjshëm të të dhënave kompjuterike, ndërhyrjen në të dhënat kompjuterike, keqpërdorimin e pajisjeve dhe ndërhyrjen e padrejtë në jetën private.
Hetimet pritet të sqarojnë mënyrën se si janë siguruar dhe shpërndarë pamjet, si dhe përgjegjësitë e personave të përfshirë.