“Nuk më pëlqente ajo që shihja në pasqyrë”, Melisa Aslı Yazıcı rrëfen pasiguritë për pamjen

Aktorja dhe modelja turko-holandeze Melisa Aslı Yazıcı ka folur për pasiguritë që e kanë shoqëruar ndër vite, presionin e standardeve të bukurisë dhe ndryshimet që ka sjellë mëmësia në mënyrën si e sheh veten.

Në një intervistë për emisionin “#ABtalks”, me moderator Anas Bukhash, fituesja e “Miss Turkey 2011” u ndal te vështirësia për ta pranuar pamjen e saj, pavarësisht suksesit në modeling dhe aktrim.

“Kur shihesha në pasqyrë, gjithmonë gjeja diçka që nuk më pëlqente”, u shpreh ajo.

E njohur për rolet në “Karagül”, “Kızıl Goncalar” dhe “Love Tactics”, Melisa foli për një anë më personale të jetës së saj, përtej personazheve që interpreton në ekran. Gjatë bisedës, ajo trajtoi ndikimin e standardeve të ashpra të bukurisë, dietat e vazhdueshme dhe përpjekjet për t’u pëlqyer të tjerëve.

Rrëfimi i saj nxori në pah pasiguritë që mund të qëndrojnë pas një imazhi publik të suksesshëm. Për aktoren, marrëdhënia me pamjen ka qenë pjesë e një procesi më të gjatë për të kuptuar dhe vlerësuar veten.

Një tjetër temë e intervistës ishte kërkimi i përkatësisë. E rritur mes Holandës dhe Turqisë, ajo reflektoi mbi përvojën e jetesës mes dy kulturave dhe mënyrën si kjo ka ndikuar në formimin e identitetit të saj.

Melisa u ndal gjithashtu te mëmësia dhe rëndësia që ka marrë familja në jetën e saj. Bashkëshortja e futbollistit Yusuf Yazıcı e përshkroi këtë periudhë si pjesë të rrugëtimit drejt shërimit emocional dhe një ndjenje më të fortë të vlerës personale.

Në qendër të bisedës ishte ndryshimi i prioriteteve: nga përpjekja për të përmbushur pritshmëritë e të tjerëve, te zgjedhja për t’i dhënë më shumë hapësirë vetes dhe familjes.