“Kur vazhdon, gjithçka bëhet më mirë”, Jennifer Lopez feston 57-vjetorin me mesazh domethënës pas divorcit nga Ben Affleck

Këngëtarja dhe aktorja e njohur publikoi një video ku shfaqej e ulur në sediljen e pasagjerit të një automjeti. E veshur me një fustan të bardhë me rripa të hollë, Lopez buzëqeshte para kamerës, ndërsa flokët i valëviteshin nga era.

Postimin e shoqëroi me një mesazh të shkurtër, por domethënës: “Kur vazhdon, gjithçka thjesht bëhet më mirë”.

Ky reagim erdhi vetëm pak ditë pas datës që do të kishte shënuar përvjetorin e katërt të martesës së saj me Ben Affleck. Për këtë arsye, shumë fansa kanë aluduar se këngëtarja mund t’i jetë referuar fillimit të një kapitulli të ri në jetën e saj personale.

Jennifer Lopez ka folur edhe më herët për ndryshimet që ka përjetuar vitet e fundit. Në një intervistë për People, ajo është shprehur se sot ndihet krejtësisht ndryshe nga pesë vite më parë dhe se rritja e saj nuk lidhet vetëm me pamjen e jashtme.

“Ndzihem shumë më e vetëdijshme për veten dhe më e realizuar. Kjo është ajo që kontribuon në bukurinë e vërtetë”, është shprehur artistja, duke theksuar se kalimi i viteve e ka ndihmuar të ndihet më e sigurt dhe më rehat me veten.

Pak ditë para ditëlindjes, Lopez ndau edhe disa momente nga një udhëtim festiv me motrën e saj, Lynda Lopez. Ajo publikoi fotografi nga pushimet e tyre dhe shkroi se një udhëtim i përbashkët për ditëlindje është “gjithmonë një ide e mirë”.

Jennifer Lopez dhe Ben Affleck rikthyen lidhjen e tyre në vitin 2021, pothuajse dy dekada pas ndarjes së parë. Dyshja u martua në vitin 2022, por marrëdhënia e tyre përfundoi më pas me divorc.

Postimi i fundit i Lopez duket se tregon se ajo po e përqafon me optimizëm këtë fazë të re të jetës së saj.