Një studim i gjerë i realizuar në Angli ka ngritur shqetësim në komunitetin shkencor, duke treguar se të paktën 11 lloje të ndryshme kanceri janë në rritje tek të rinjtë. Analiza, e kryer nga Instituti i Kërkimeve për Kancerin dhe Imperial College London, evidenton një shtim të rasteve tek grupmoshat nga fundi i adoleshencës deri në të 40-at, një fenomen që prej vitesh ka mbetur i pashpjeguar plotësisht.
Sipas studiuesve, një nga arsyet kryesore që mund të ndikojë në këtë rritje është shtimi i mbipeshës dhe obezitetit në dekadat e fundit. Rritja e yndyrës trupore mund të ndryshojë balancën hormonale, përfshirë insulinën, duke rritur rrezikun për zhvillimin e disa llojeve të kancerit. Megjithatë, ekspertët theksojnë se ky faktor nuk e shpjegon plotësisht fenomenin.
Ndër llojet e kancerit që po shënojnë rritje përfshihen ai i zorrëve, tiroides, mëlçisë, veshkave, pankreasit, fshikëzës së tëmthit, si dhe kanceri i gjirit, vezoreve dhe gojës. Veçanërisht shqetësues mbetet kanceri i zorrës së trashë dhe ai i gjirit, të cilët regjistrojnë mijëra raste çdo vit tek të rinjtë.
Rasti i Bradley Coombes, një 23-vjeçar nga Portsmouth që humbi jetën nga kanceri i zorrëve, ilustron tragjikisht këtë trend. Pavarësisht simptomave, ai u konsiderua për një kohë të gjatë “shumë i ri” për një diagnozë të tillë dhe sëmundja iu zbulua vetëm pasi kishte avancuar ndjeshëm.
Ndërkohë, studiuesit vënë në dukje se faktorët tradicionalë të rrezikut si duhani, alkooli apo mungesa e aktivitetit fizik nuk kanë pësuar rritje të ndjeshme, çka e bën më të vështirë identifikimin e shkakut kryesor. Për këtë arsye, po hetohen edhe faktorë të tjerë të mundshëm, si ushqimet ultra të përpunuara, ndotja e ajrit, përdorimi i antibiotikëve dhe ndryshimet në mikrobiomën e zorrëve.
Ekspertët theksojnë se, megjithëse rastet tek të rinjtë janë në rritje, kanceri mbetet më i zakonshëm tek moshat mbi 50 vjeç. Megjithatë, ata nënvizojnë rëndësinë e një stili jetese të shëndetshëm dhe diagnostikimit të hershëm për të ulur rrezikun.
Burimi; https://www.theguardian.com/society/2026/apr/29/cancer-rise-young-people-study-uk
Foto; Freepik.com