Policia Metropolitane e Londrës ka nisur një verifikim të brendshëm pas deklaratës së Meghan Markle se në vitin 2018 i ishte përcjellë një letër me akuza shqetësuese ndaj babait të saj, Thomas Markle.

Një zëdhënës i policisë tha për ABC News dhe Page Six se po kontrollohet nëse oficerë të njësisë përgjegjëse për mbrojtjen e familjes mbretërore dhe mbrojtjen speciale kanë qenë të përfshirë në përcjelljen e letrës.

Në një deklaratë të premten, Dukesha e Sussex u shpreh se letra fillimisht u ishte dërguar autoriteteve policore dhe më pas i ishte përcjellë asaj. Sipas Meghan, në atë kohë i ishte thënë se pretendimet po hetoheshin.

Megjithatë, sipas raportimeve të CBS News dhe GB News, Policia Metropolitane nuk ka kryer dhe nuk po kryen aktualisht një hetim ndaj Thomas Markle. Verifikimi i brendshëm lidhet me mënyrën se si është trajtuar letra.

Ndërkohë, autoritetet filipinase po shqyrtojnë akuza ndaj 82-vjeçarit. Sipas agjencisë shtetërore të lajmeve PNA, zyrtari i Departamentit të Drejtësisë, Nicholas Ty, tha se çështja po trajtohet nga grupi i punës kundër trafikimit të qenieve njerëzore dhe abuzimit e shfrytëzimit seksual të fëmijëve në internet.

Pretendimet janë ngritur nga djali i tij, Thomas Markle Jr., i cili deklaron se ka gjetur materiale të abuzimit seksual me fëmijë në banesën e të atit në Cebu. FBI-ja ka konfirmuar për ABC News se është në dijeni të akuzave dhe se do të ndihmojë autoritetet filipinase.

Thomas Markle i mohon pretendimet dhe, sipas raportimit, ndaj tij nuk është ngritur asnjë akuzë zyrtare.